ಗರ್ಭಿಣಿ ಮಹಿಳೆಯ ಆರೋಗ್ಯ ಇತರರಿಗೆ ಹೋಲಿಸಿದರೆ ತುಂಬಾ ಸೂಕ್ಷ್ಮ ಎಂದು ಹೇಳುತ್ತಾರೆ. ಗರ್ಭಾವಸ್ಥೆಯ ಸಂದರ್ಭದಲ್ಲಿ ಮಹಿಳೆಯರು ಎಷ್ಟೇ ಜಾಗರೂಕರಾಗಿದ್ದರೂ ಕಡಿಮೆಯೇ. ಏಕೆಂದರೆ ಗರ್ಭಾವಸ್ಥೆಯಲ್ಲಿರುವ ತಾಯಿಗೆ ತನ್ನ ಹಾಗೂ ತನ್ನ ಮಗುವಿನ ಆರೋಗ್ಯದ ಬಗ್ಗೆ ಹೆಚ್ಚು ಕಾಳಜಿ ಇರಬೇಕು. ತಮ್ಮ ದಿನ ನಿತ್ಯದ ಚಟುವಟಿಕೆಗಳಿಂದ ಹಿಡಿದು, ಮಾನಸಿಕ ಒತ್ತಡ ನಿವಾರಣೆಯ ಜೊತೆಗೆ ನಮ್ಮ ಆಹಾರ ಪದ್ಧತಿಯ ಕಡೆಗೂ ಸಾಕಷ್ಟು ಗಮನ ವಹಿಸಬೇಕು. ಸೇವಿಸುವ ಯಾವುದೇ ಆಹಾರ ತನ್ನ ಆರೋಗ್ಯಕ್ಕೆ ಮಾರಕ ಪರಿಣಾಮಗಳನ್ನು ತಕ್ಷಣಕ್ಕೆ ಅಥವಾ ಹೆರಿಗೆಯ ಸಮಯದಲ್ಲಿ ಉಂಟು ಮಾಡುವಂತೆ ಆಗಬಾರದು.
ಗರ್ಭಧಾರಣೆಗೆ ಮುಂಚೆ ಮಹಿಳೆಯರು ಒಮ್ಮೆ ಸ್ತ್ರೀ ರೋಗ ತಜ್ಞರನ್ನು ಭೇಟಿ ಮಾಡಿ ತಮ್ಮ ಗರ್ಭಾವಸ್ಥೆಯ ಇಡೀ 9 ತಿಂಗಳ ಸಮಗ್ರ ಚಿತ್ರಣ ಹೇಗಿರಲಿದೆ ಎಂಬುದರ ಮಾಹಿತಿ ಪಡೆಯಬೇಕು. ಯಾವ ಬಗೆಯ ಆಹಾರಗಳನ್ನು ಸೇವಿಸಬೇಕು ಯಾವ ಆಹಾರಗಳನ್ನು ಕಟ್ಟುನಿಟ್ಟಾಗಿ ತಿನ್ನಲೇಬಾರದು, ಬೆಳಗಿನಿಂದ ಸಂಜೆಯವರೆಗೂ ನಮ್ಮ ಜೀವನ ಶೈಲಿ ಯಾವ ರೀತಿ ಇರಬೇಕು, ಮಧುಮೇಹ, ರಕ್ತದ ಒತ್ತಡದಂತಹ ಸಮಸ್ಯೆಗಳನ್ನು ಹೇಗೆ ನಿರ್ವಹಣೆ ಮಾಡಬೇಕು ಎಂಬುದರ ಬಗ್ಗೆ ಚರ್ಚಿಸಿ ತನ್ನ ಸದ್ಯದ ಆರೋಗ್ಯ ಪರಿಸ್ಥಿತಿಯನ್ನು ಮತ್ತು ಈಗಾಗಲೇ ತೆಗೆದುಕೊಳ್ಳುತ್ತಿರುವ ಔಷಧಿಗಳ ಮಾಹಿತಿಯನ್ನು ಒದಗಿಸಿ ಸೂಕ್ತ ಸಲಹೆಗಳನ್ನು ಅವರಿಂದ ಪಡೆಯಬೇಕು. ನಂತರವಷ್ಟೇ ಗರ್ಭಧಾರಣೆಯ ಬಗ್ಗೆ ಯೋಚಿಸಬೇಕು.
ಪಾಶ್ಚೀಕರಿಸದ ಹಾಲು ಮತ್ತು ಹಾಲಿನ ಉತ್ಪನ್ನಗಳು
ಹಾಲಿನಲ್ಲಿ ಕ್ಯಾಲ್ಸಿಯಂ ಅಂಶ ಹೇರಳವಾಗಿದೆ. ಇದು ಗರ್ಭಾವಸ್ಥೆಯಲ್ಲಿರುವ ಗರ್ಭಿಣಿಗೆ ಬಹಳ ಅಗತ್ಯ. ಏಕೆಂದರೆ ಗರ್ಭಾವಸ್ಥೆಯ ಸಮಯದಲ್ಲಿ ಭ್ರೂಣದಲ್ಲಿರುವ ಮಗುವಿನ ಮೂಳೆಗಳ ಬೆಳವಣಿಗೆಗೆ ಕ್ಯಾಲ್ಸಿಯಂ ಅಂಶ ಬೇಕೇ ಬೇಕು. ಒಂದು ವೇಳೆ ಇದು ಸೇವಿಸುವ ಆಹಾರದಲ್ಲಿ ಪೂರೈಕೆಯಾಗದೆ ಇದ್ದರೆ, ಗರ್ಭಿಣಿಯ ದೇಹದ ಮೂಳೆಗಳು ಕ್ಯಾಲ್ಸಿಯಂ ಅಂಶವನ್ನು ಕಳೆದುಕೊಳ್ಳಬೇಕಾಗುತ್ತದೆ. ಜೊತೆಗೆ ಮಗುವಿನ ದೇಹ ಬೆಳವಣಿಗೆಯಲ್ಲಿ ಗರ್ಭಿಣಿಯ ದೇಹದ ಮೂಳೆಗಳ ಕ್ಯಾಲ್ಸಿಯಂ ಅಂಶಗಳನ್ನು ಗರ್ಭಾಶಯ ಬಳಸಿಕೊಳ್ಳುತ್ತದೆ. ಹಾಗಾಗಿ ಗರ್ಭಧಾರಣೆಯ ನಂತರ ಮಹಿಳೆಯರು ಈ ವಿಷಯದಲ್ಲಿ ಹೆಚ್ಚು ಜಾಗೃತಿ ವಹಿಸಬೇಕು.
ಪ್ರತಿ ದಿನ ತಾವು ಕುಡಿಯುವ ಒಂದು ಗ್ಲಾಸ್ ಹಾಲು, ಪಾಶ್ಚೀಕರಿಸಿದ ಹಾಲು ಎಂಬುದನ್ನು ಖಾತ್ರಿಪಡಿಸಿಕೊಳ್ಳಬೇಕು. ಏಕೆಂದರೆ ಪಾಶ್ಚೀಕರಿಸದ ಹಾಲಿನಲ್ಲಿ ಮತ್ತು ಹಾಲಿನ ಇನ್ನಿತರ ಉತ್ಪನ್ನಗಳಲ್ಲಿ ‘ ಲಿಸ್ಟೀರಿಯೋಸಿಸ್ ‘ ಎಂಬ ಬ್ಯಾಕ್ಟೀರಿಯಾ ಸೋಂಕು ಇದ್ದು, ಇತರ ಮಹಿಳೆಯರಿಗಿಂತ ಗರ್ಭಿಣಿ ಮಹಿಳೆಯರಿಗೆ ಇದರ ಸೋಂಕು ಹಬ್ಬುವುದು ಶೇಕಡ 20 ರಷ್ಟು ಹೆಚ್ಚಿರುತ್ತದೆ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಇದಕ್ಕೆ ಕಾರಣ ಗರ್ಭಿಣಿ ಮಹಿಳೆಯರಲ್ಲಿ ದಿನೇ ದಿನೇ ರೋಗ ನಿರೋಧಕ ವ್ಯವಸ್ಥೆ ಕಡಿಮೆಯಾಗುತ್ತಲೇ ಇರುತ್ತದೆ. ಒಂದು ವೇಳೆ ಈ ಬ್ಯಾಕ್ಟೀರಿಯಾದ ಸೋಂಕು ಉಂಟಾದರೆ ರೋಗ ಲಕ್ಷಣಗಳು ಕಾಣಿಸದೆ ಆರೋಗ್ಯಕ್ಕೆ ತೊಂದರೆ ಕೊಡಬಹುದು. ಜೊತೆಗೆ ಅವಧಿಗೆ ಮುನ್ನ ಹೆರಿಗೆ, ಅಬಾರ್ಶನ್ ಇತ್ಯಾದಿ ಸಮಸ್ಯೆಗಳು ಕಾಣಿಸುವ ಸಾಧ್ಯತೆ ಇರುತ್ತದೆ.
ಗಿಡಮೂಲಿಕೆಗಳ ಚಹಾ
ಗಿಡಮೂಲಿಕೆ ಎಂದ ತಕ್ಷಣ ಅದು ಆಯುರ್ವೇದಕ್ಕೆ ಸಂಬಂಧ ಪಟ್ಟ ವಿಚಾರವಾಗಿರುತ್ತದೆ. ಗರ್ಭಿಣಿ ಮಹಿಳೆಯರು ತಮ್ಮ ಗರ್ಭಾವಸ್ಥೆಯ ಅವಧಿಯಲ್ಲಿ ಅದಾಗಲೇ ಸಾಕಷ್ಟು ವೈದ್ಯರು ಸೂಚಿಸಿದ ಔಷಧಿಗಳನ್ನು ತೆಗೆದುಕೊಳ್ಳುತ್ತಿರುತ್ತಾರೆ. ಇದರ ಜೊತೆಗೆ ಗಿಡಮೂಲಿಕೆಯ ಉತ್ಪನ್ನಗಳಾದ ಫ್ಲಾಕ್ಸ್ ಸೀಡ್ಸ್, ಪೆಪ್ಪರ್ ಮಿಂಟ್, ಚಾಮೋಮೈಲ್ ಚಹಾ ಅಥವಾ ಗ್ರೀನ್ ಟೀ ಕುಡಿಯುವ ಅಭ್ಯಾಸ ಮಾಡಿಕೊಂಡರೆ, ಹುಟ್ಟು ಮಗುವಿನ ದೇಹದ ತೂಕ ತುಂಬಾ ಕಡಿಮೆ ಇರುತ್ತದೆ ಎಂದು ಹೇಳುತ್ತಾರೆ.
ಕೆಲವೊಂದು ಸಂಶೋಧನೆಗಳು ನಡೆಸಿದ ಅಧ್ಯಯನದಲ್ಲಿ ಈ ವಿಚಾರ ದೃಢವಾಗಿದೆ. ಗರ್ಭಿಣಿಯ ಗರ್ಭಾವಸ್ಥೆಯ ಕೊನೆಯ 2 ತ್ರೈಮಾಸಿಕಗಳಲ್ಲಿ ಗಿಡಮೂಲಿಕೆ ಅಥವಾ ಆಯುರ್ವೇದ ಔಷಧಿಗಳು ಗಮನಾರ್ಹವಾಗಿ ತೊಂದರೆ ಉಂಟು ಮಾಡುವ ಸಾಧ್ಯತೆ ಇರುತ್ತದೆ. ಹಾಗಾಗಿ ಗರ್ಭಿಣಿಯರು ದೇಹದ ಆರೋಗ್ಯ ಮತ್ತು ತಮ್ಮ ಮಗುವಿನ ಆರೋಗ್ಯಕರ ಬೆಳವಣಿಗೆಯನ್ನು ಗಮನದಲ್ಲಿಟ್ಟುಕೊಂಡು ಸ್ತ್ರೀರೋಗ ತಜ್ಞರು ಸೂಚಿಸಿದ ಔಷಧಿಗಳನ್ನು ಮತ್ತು ಆಹಾರಗಳನ್ನು ಮಾತ್ರ ಸೇವಿಸಬೇಕು.
ಕೃತಕ ಸಿಹಿ ಕಾರಕಗಳು
ಗರ್ಭಿಣಿ ಮಹಿಳೆಯರು ತಮ್ಮ ಅತಿ ಸೂಕ್ಷ್ಮವಾದ ಗರ್ಭಾವಸ್ಥೆಯ ಸಮಯದಲ್ಲಿ ಸಾಧ್ಯವಾದಷ್ಟು ನೈಸರ್ಗಿಕ ಅಥವಾ ಮೂಲ ಆಹಾರಗಳ ಸೇವನೆಯ ಕಡೆಗೆ ಮಾತ್ರ ಒತ್ತು ಕೊಡಬೇಕು. ಇದು ತಮ್ಮ ಹಾಗೂ ತಮ್ಮ ಮಗುವಿನ ಆರೋಗ್ಯಕ್ಕೆ ನಿಜವಾಗಲೂ ಸಹಕಾರಿ. ಕೃತಕ ಸಿಹಿ ಕಾರಕ ಅಂಶಗಳನ್ನು ಹೊಂದಿರುವ ಸಾಫ್ಟ್ ಡ್ರಿಂಕ್ಸ್ ಗಳನ್ನು ಅಪ್ಪಿ ತಪ್ಪಿ ಈ ಸಮಯದಲ್ಲಿ ಕುಡಿಯಬಾರದು. ಇದರಿಂದ ಹೆರಿಗೆ ಸಮಯದಲ್ಲಿ ಸಾಕಷ್ಟು ತೊಂದರೆ ಅನುಭವಿಸುವ ಪ್ರಮೇಯ ಎದುರಾಗುತ್ತದೆ.
ಅರ್ಧಂಬರ್ಧ ಬೇಯಿಸಿದ ಸಮುದ್ರಾಹಾರಗಳು
ಗರ್ಭಿಣಿ ಮಹಿಳೆಯರ ಆರೋಗ್ಯವನ್ನು ಗಮನಕ್ಕೆ ತೆಗೆದುಕೊಂಡು ಸ್ತ್ರೀ ರೋಗ ತಜ್ಞರು ಮಗುವಿನ ಸಮಗ್ರ ಬೆಳವಣಿಗೆಗೆ ಹಾಗೂ ತಾಯಿಯ ಆರೋಗ್ಯ ಸದೃಡವಾಗಿರಲು ಅವರ ಆಹಾರ ಪದ್ಧತಿಯಲ್ಲಿ ಸಮುದ್ರಾಹಾರ ಇರಬೇಕೆಂದು ಸೂಚಿಸುತ್ತಾರೆ. ಆದರೆ ಸಮುದ್ರಾಹಾರಗಳನ್ನು ಸಹ ಅರ್ಧಂಬರ್ಧ ಬೇಯಿಸಿ ತಿನ್ನಬಾರದು. ಇದರಿಂದ ಪ್ಯಾರಾಸೈಟಿಕ್ ಕಾಯಿಲೆಗಳು ಕಾಣಿಸಿಕೊಳ್ಳುತ್ತವೆ. ಅದರಲ್ಲೂ ಸಮುದ್ರದಲ್ಲಿರುವ ಮೀನುಗಳಲ್ಲಿ ಹೆಚ್ಚಿನ ಪ್ರಮಾಣದ ಮರ್ಕ್ಯುರಿ ಅಂಶ ಇರುವುದರಿಂದ ಇದು ಭ್ರೂಣದಲ್ಲಿರುವ ಮಗುವಿನ ಮೆದುಳಿಗೆ ಹಾನಿ ಮಾಡುತ್ತದೆ ಎಂದು ಹೇಳುತ್ತಾರೆ.
ಹಾಗಾಗಿ ಗರ್ಭಿಣಿ ಮಹಿಳೆಯರು ಮೀನಿನ ವಿಚಾರದಲ್ಲಿ ಸ್ವಲ್ಪ ಎಚ್ಚರಿಕೆಯಿಂದ ಇರಬೇಕು. ಶೆಲ್ ಫಿಶ್, ಟುನ ಮೀನುಗಳಿಂದ ದೂರವಿದ್ದರೆ ಒಳ್ಳೆಯದು. ಮೀನುಗಳು ಒಮೆಗಾ 3 ಫ್ಯಾಟಿ ಆಸಿಡ್ ಅಂಶಗಳಲ್ಲಿ ಯಥೇಚ್ಛವಾಗಿದ್ದು, ಮಗುವಿನ ದೇಹದ ಸಮಗ್ರ ಬೆಳವಣಿಗೆಗೆ ಮತ್ತು ತಾಯಿಯ ಆರೋಗ್ಯಕ್ಕೆ ಸಾಕಷ್ಟು ಒಳ್ಳೆಯದು ಎಂದು ಹೇಳುತ್ತಾರೆ. ಸಾಧ್ಯವಾದಷ್ಟು ಈ ಸಮಯದಲ್ಲಿ ಗರ್ಭಿಣಿಯರು ಶುದ್ಧ ನೀರಿನ ಮೀನುಗಳಾದ ರೋಹೂ, ಕಟ್ಲಾ, ಪ್ರಾಮ್ ಫ್ರೆಟ್ ಇತ್ಯಾದಿಗಳನ್ನು ಆಯ್ಕೆ ಮಾಡಿಕೊಂಡರೆ ಒಳ್ಳೆಯದು. ಇವುಗಳಲ್ಲಿ ಮರ್ಕ್ಯುರಿ ಅಂಶ ತುಂಬಾ ಕಡಿಮೆ ಪ್ರಮಾಣದಲ್ಲಿದ್ದು, ಆರೋಗ್ಯಕ್ಕೆ ಇದರಿಂದ ಯಾವುದೇ ಹಾನಿ ಉಂಟಾಗುವುದಿಲ್ಲ. ಇದರ ಜೊತೆಗೆ ರೆಫ್ರಿಜರೇಟರ್ ಆಹಾರಗಳನ್ನು ಸೇವಿಸಬಾರದು ಎಂದು ಹೇಳುತ್ತಾರೆ.
ಹಸಿ ಮೊಳಕೆ ಕಟ್ಟಿದ ಕಾಳುಗಳು ಮತ್ತು ತರಕಾರಿಗಳು
ಗರ್ಭಿಣಿ ಮಹಿಳೆಯರಿಗೆ ಹಸಿ ತರಕಾರಿಗಳು ಆರೋಗ್ಯಕ್ಕೆ ಸೂಕ್ತ ಎಂದು ಸಾಕಷ್ಟು ಜನರು ಹೇಳುತ್ತಾರೆ. ಇದು ಸತ್ಯ ಕೂಡ. ಆದರೆ ಯಾವುದೇ ಕಾರಣಕ್ಕೂ ಹಸಿಯಾದ ತರಕಾರಿಗಳನ್ನು ತಿನ್ನುವ ಮುಂಚೆ ಚೆನ್ನಾಗಿ ತೊಳೆಯದೆ ಮಾತ್ರ ತಿನ್ನಬಾರದು. ಏಕೆಂದರೆ ಇವುಗಳ ಮೇಲೆ ಬ್ಯಾಕ್ಟೀರಿಯಾಗಳ ಸೋಂಕು ಹೆಚ್ಚಿರುತ್ತದೆ. ಇನ್ನು ಮೊಳಕೆ ಕಟ್ಟಿದ ಕಾಳುಗಳೂ ಅಷ್ಟೇ. ಹಲವಾರು ವೈರಸ್ ಗಳು ಮತ್ತು ಬ್ಯಾಕ್ಟೀರಿಯಾಗಳು ಇವುಗಳ ಮೇಲೆ ಬೆಳವಣಿಗೆ ಹೊಂದಿರುತ್ತವೆ.
ವೈದ್ಯರು ಹೇಳಿದ್ದಾರೆ ಎಂದು ಯಾವುದೇ ಕಾರಣಕ್ಕೂ ಆತುರವಾಗಿ ಹಸಿ ತರಕಾರಿಗಳನ್ನು ಮತ್ತು ಮೊಳಕೆ ಕಟ್ಟಿದ ಕಾಳುಗಳನ್ನು ಒಮ್ಮೆ ಶುಚಿ ಮಾಡದೆ ಸೇವಿಸುವುದರಿಂದ ಬೆಳವಣಿಗೆಯ ಹಂತದಲ್ಲಿರುವ ಮಗುವಿನ ಆರೋಗ್ಯಕ್ಕೆ ಸೋಂಕು ಉಂಟಾಗಿ ಸಾಕಷ್ಟು ತೊಂದರೆ ಆಗುತ್ತದೆ. ಹಾಗಾಗಿ ತಿನ್ನುವ ಮುಂಚೆ ಮೊಳಕೆ ಕಟ್ಟಿದ ಕಾಳುಗಳನ್ನು ಚೆನ್ನಾಗಿ ಬೇಯಿಸಿ ಅಥವಾ ನೀರಿನಲ್ಲಿ ಕುದಿಸಿ ತಿನ್ನುವುದರಿಂದ ಸಾಕಷ್ಟು ಆರೋಗ್ಯ ಲಾಭಗಳು ಉಂಟಾಗುತ್ತವೆ.
ಹಸಿಯಾದ ಅಥವಾ ಅರ್ಧಂಬರ್ಧ ಬೇಯಿಸಿದ ಮೊಟ್ಟೆಗಳು
ಮೊಟ್ಟೆಗಳಲ್ಲಿ ಪ್ರೊಟೀನ್ ಅಂಶ ಸಾಕಷ್ಟಿದೆ. ಇದನ್ನು ನೋಡಿ ವೈದ್ಯರು ಹಾಗೂ ಸ್ತ್ರೀ ರೋಗ ತಜ್ಞರು ಗರ್ಭಾವಸ್ಥೆಯ ಸಮಯದಲ್ಲಿ ಗರ್ಭಿಣಿಯರು ಇಂತಹ ಹೆಚ್ಚು ಪ್ರೊಟೀನ್ ಆಹಾರಗಳನ್ನು ಸೇವಿಸಿದರೆ, ಗರ್ಭಿಣಿಯ ದೇಹಕ್ಕೆ ಮತ್ತು ಗರ್ಭದಲ್ಲಿರುವ ಮಗುವಿನ ಬೆಳವಣಿಗೆಗೆ ಸಹಕಾರಿ ಎಂದು ಸಲಹೆ ಕೊಟ್ಟಿರುತ್ತಾರೆ. ಹಾಗಾಗಿ ಗರ್ಭಾವಸ್ಥೆಯ ಸಮಯದಲ್ಲಿ ಮೊಟ್ಟೆಯ ಸೇವನೆ ಬಹಳ ಒಳ್ಳೆಯದು. ಆದರೆ ಯಾವುದೇ ಕಾರಣಕ್ಕೂ ಹಸಿಯಾದ ಅಥವಾ ಸ್ವಲ್ಪ ಬೇಯಿಸಿದ ಮೊಟ್ಟೆಯನ್ನು ಗರ್ಭಿಣಿಯರು ತಿನ್ನಬಾರದು. ಏಕೆಂದರೆ ಇದರಲ್ಲಿ ಸಲ್ಮೊನೆಲ್ಲಾ ಸೋಂಕು ಅಡಗಿರುತ್ತದೆ.
ಇದರಿಂದ ಜ್ವರ, ವಾಕರಿಕೆ, ವಾಂತಿ, ಹೊಟ್ಟೆ ಸೆಳೆತ ಉಂಟಾಗುವುದರ ಜೊತೆಗೆ ಗರ್ಭದಲ್ಲಿರುವ ಮಗುವಿಗೆ ನೇರವಾಗಿ ಸೋಂಕು ತಗಲುವ ಸಾಧ್ಯತೆ ಹೆಚ್ಚಿರುತ್ತದೆ. ಹಾಗಾಗಿ ಯಾವುದೇ ಕಾರಣಕ್ಕೂ ಗರ್ಭಿಣಿಯರು ತಮ್ಮ ಹಾಗೂ ತಮ್ಮ ಮಗುವಿನ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು ಕೇವಲ ಬೇಯಿಸಿದ ಅಥವಾ ಚೆನ್ನಾಗಿ ನೀರಿನಲ್ಲಿ ಕುದಿಸಿದ ಮೊಟ್ಟೆಗಳನ್ನು ಮಾತ್ರ ತಿನ್ನಬೇಕು.
ಜೇನು ತುಪ್ಪ
ಗರ್ಭಿಣಿಯರು ನಿತ್ಯ ನಿಯಮಿತವಾಗಿ ಜೇನು ತುಪ್ಪವನ್ನು ಸೇವಿಸುವುದರಿಂದ ಗರ್ಭದಲ್ಲಿರುವ ಮಗುವಿಗೆ ಸಾಕಷ್ಟು ತೊಂದರೆ ಆಗುತ್ತದೆ. ಕೆಲವು ಸಂಶೋಧನೆಗಳು ನಡೆಸಿರುವ ಅಧ್ಯಯನದಲ್ಲಿ ಪ್ರತಿ ದಿನ ಸೇವಿಸುವ ಜೇನು ತುಪ್ಪ ಕರುಳ ಬಳ್ಳಿಯನ್ನು ಕತ್ತರಿಸಿರುವ ಉದಾಹರಣೆಗಳಿವೆ ಎಂದು ಹೇಳುತ್ತಾರೆ. ಜೊತೆಗೆ ಜೇನು ತುಪ್ಪದಲ್ಲಿ ಕೆಲವು ಸೋಂಕಿನ ಅಂಶಗಳು ಕಂಡು ಬಂದಿರುವುದರಿಂದ ಭ್ರೂಣದಲ್ಲಿರುವ ಮಗುವಿನ ಆರೋಗ್ಯ ಬೊಟುಲಿಸ್ಮ್ ಎಂಬ ಪ್ಯಾರಾಸೈಟಿಕ್ ಕಾಯಿಲೆಗೆ ಗುರಿಯಾಗಬೇಕಾಗುತ್ತದೆ.
ಚೈನೀಸ್ ಖಾದ್ಯಗಳು
ಇತ್ತೀಚಿಗೆ ಚೈನೀಸ್ ಆಹಾರ ಪದಾರ್ಥಗಳು ಸಾಕಷ್ಟು ಪ್ರಚಾರ ಪಡೆದುಕೊಳ್ಳುತ್ತಿವೆ. ಸ್ತ್ರೀರೋಗ ತಜ್ಞರನ್ನು ಕೇಳುವುದಾದರೆ ಗರ್ಭಾವಸ್ಥೆಯಲ್ಲಿರುವ ಮಹಿಳೆಯರು ಚೀನಿ ಆಹಾರಗಳಿಂದ ತಮ್ಮ ಇಡೀ ಗರ್ಭಾವಸ್ಥೆಯ 9 ತಿಂಗಳ ಸಮಯದಲ್ಲಿ ದೂರವಿದ್ದರೆ ಒಳ್ಳೆಯದು. ಏಕೆಂದರೆ ಚೀನಿ ಆಹಾರಗಳಲ್ಲಿ ಹೆಚ್ಚು ಸೋಡಿಯಂ ಮತ್ತು MSG ಅಥವಾ ಮೋನೋಸೋಡಿಯಂ ಗ್ಲುಟಮೇಟ್ ಅಂಶಗಳು ಕಂಡು ಬಂದಿದ್ದು, ಇವುಗಳು ಭ್ರೂಣದಲ್ಲಿರುವ ಮಗುವಿನ ಬೆಳವಣಿಗೆಯನ್ನು ಕುಂಠಿತಗೊಳಿಸುತ್ತವೆ ಮತ್ತು ಹೆರಿಗೆಯಾದ ನಂತರ ಹುಟ್ಟಿದ ಮಕ್ಕಳ ದೇಹದ ತೂಕ ಸಾಕಷ್ಟು ಕಡಿಮೆ ಇರುತ್ತದೆ. ಇದರ ಜೊತೆಗೆ ಹೆರಿಗೆ ಸಮಯದಲ್ಲಿ ಸಹ ಗರ್ಭಿಣಿಯರಿಗೆ ಸಾಕಷ್ಟು ಆರೋಗ್ಯ ಸಮಸ್ಯೆಗಳು ಒಮ್ಮೆಲೆ ಕಾಡುತ್ತವೆ ಎಂದು ಹೇಳುತ್ತಾರೆ.
ನಿಮಗೆ ಅಲರ್ಜಿ ಎನಿಸುವ ಆಹಾರಗಳನ್ನು ತಿನ್ನಬೇಡಿ
ಮೊದಲೇ ಹೇಳಿದಂತೆ ಗರ್ಭಾವಸ್ಥೆಯಲ್ಲಿರುವ ಗರ್ಭಿಣಿ ಮಹಿಳೆಯರು ವೈದ್ಯರು ಸೂಚಿಸಿದ ಔಷಧಿಗಳನ್ನು ಮತ್ತು ಆಹಾರಗಳನ್ನು ಮಾತ್ರ ಸೇವಿಸಬೇಕು. ಕೆಲವೊಂದು ಆಹಾರಗಳು ನಿಮ್ಮ ದೇಹಕ್ಕೆ ಹಿಡಿಸದಿದ್ದರೆ ಅವುಗಳನ್ನು ಸೇವಿಸಬೇಡಿ. ಸೇವಿಸಿದರೆ ಏನಾಗಬಹುದು ಎಂಬ ಪರೀಕ್ಷೆ ಈ ಸಮಯದಲ್ಲಿ ಬೇಡ. ಇದರಿಂದ ಬೆಳವಣಿಗೆಯ ಹಂತದಲ್ಲಿರುವ ಹುಟ್ಟುವ ಮಗುವಿನ ಮೇಲೆ ಸಾಕಷ್ಟು ಕೆಟ್ಟ ಪರಿಣಾಮ ಬೀರುತ್ತದೆ ಎಂದು ಸ್ತ್ರೀರೋಗ ತಜ್ಞರು ಹೇಳುತ್ತಾರೆ.
ಮಿಕ್ಕುಳಿದ ರೆಫ್ರಿಜರೇಟೆಡ್ ಆಹಾರಗಳು
ಸಾಮಾನ್ಯ ಸಮಯದಲ್ಲಿ ರೆಫ್ರಿಜರೇಟರ್ ನಲ್ಲಿ ಶೇಖರಣೆ ಮಾಡಿಟ್ಟ ಮೊಸರು, ಪಲ್ಯ, ಹಾಲು, ಮಜ್ಜಿಗೆ, ಬೆಣ್ಣೆ, ಸಾರು ಇತ್ಯಾದಿಗಳನ್ನು ತಿನ್ನುತ್ತೇವೆ. ಆದರೆ ಗರ್ಭಾವಸ್ಥೆಯ ಸಮಯದಲ್ಲಿ ಇವುಗಳಿಗೆ ಅವಕಾಶವಿಲ್ಲ. ರೆಫ್ರಿಜರೇಟರ್ ನಲ್ಲಿ ಶೇಖರಣೆ ಮಾಡಿರುವ ಆಹಾರಗಳ ಮೇಲೆ ಬ್ಯಾಕ್ಟೀರಿಯಗಳು ಬೆಳವಣಿಗೆ ಹೊಂದಿರುತ್ತವೆ. ಇವು ಜಠರ ನಾಳದ ಸೋಂಕುಗಳನ್ನು ಉಂಟು ಮಾಡಿ ತಾಯಿ ಹಾಗೂ ಮಗುವಿನ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ. ಆದ್ದರಿಂದ ಗರ್ಭಿಣಿಯರು ಅಳಿದುಳಿದ ತಂಗಳು ಆಹಾರಗಳನ್ನು ಯಾವುದೇ ಕಾರಣಕ್ಕೂ ಸೇವಿಸಬಾರದು. ಹೆಚ್ಚು ಪೌಷ್ಟಿಕ ಸತ್ವಗಳನ್ನು ಹೊಂದಿರುವ ಆಹಾರಗಳ ಸೇವನೆಯ ಕಡೆಗೆ ಮಾತ್ರ ಪ್ರಾಮುಖ್ಯತೆ ಕೊಡಬೇಕು.
