ಅಡುಗೆ ರುಚಿಯಾಗಿ ಮಾಡುವುದು ಕೂಡ ಒಂದು ಕಲೆ. ಅದು ಎಲ್ಲರಿಗೂ ಬರುವುದಿಲ್ಲ. ಅಂತೆಯೇ ಅಡುಗೆಯನ್ನು ಯಾವ ಪಾತ್ರೆಯಲ್ಲಿ ತಯಾರಿ ಮಾಡಿ ತಿನ್ನಬೇಕು ಎಂದು ತಿಳಿದುಕೊಳ್ಳುವುದು ಬಹಳ ಮುಖ್ಯ. ಏಕೆಂದರೆ ನಾವು ಇದುವರೆಗೂ ತಯಾರು ಮಾಡಿ ತಿನ್ನುತ್ತಿರುವ ಬಹುತೇಕ ಅಡುಗೆ ಪಾತ್ರೆಗಳು ನಮ್ಮ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತವೆ.
ಆದರೆ ಇದರ ಅರಿವೇ ಇಲ್ಲದೆ ನಾವು ಪ್ರತಿ ದಿನ ಅದೇ ಪಾತ್ರೆಗಳಲ್ಲಿ ಅಡುಗೆ ಮಾಡಿ ತಿನ್ನುತ್ತಿದ್ದೇವೆ. ತಕ್ಷಣಕ್ಕೆ ನಮ್ಮ ಆರೋಗ್ಯದಲ್ಲಿ ಇದರಿಂದ ಯಾವುದೇ ಬದಲಾವಣೆ ಕಂಡು ಬರದೇ ಇದ್ದರೂ ಮುಂಬರುವ ದಿನಗಳಲ್ಲಿ ಆರೋಗ್ಯ ಸಮಸ್ಯೆಗಳು ದೊಡ್ಡದಾಗಿ ಎದುರಾಗುತ್ತವೆ ಎಂದು ತಜ್ಞರು ಹೇಳುತ್ತಾರೆ. ಹಾಗಾದರೆ ಯಾವೆಲ್ಲ ಅಡುಗೆ ಪಾತ್ರೆಗಳು ನಮ್ಮ ಆರೋಗ್ಯಕ್ಕೆ ಡೇಂಜರ್ ಮತ್ತು ಯಾವ ಪಾತ್ರೆಗಳಲ್ಲಿ ಅಡುಗೆ ಮಾಡಿ ತಿನ್ನಬೇಕು ಎಂಬುದನ್ನು ಈ ಲೇಖನದಲ್ಲಿ ತಿಳಿದುಕೊಳ್ಳೋಣ ಬನ್ನಿ….
ಸ್ಟೇನ್ಲೆಸ್ ಸ್ಟೀಲ್ ಪಾತ್ರೆಗಳು:–ಒಂದು ಸ್ಟೇನ್ಲೆಸ್ ಸ್ಟೈಲ್ ಪಾತ್ರೆ ತಯಾರಾಗಬೇಕಾದರೆ ಅದಕ್ಕೆ ಕ್ರೋಮಿಯಂ, ನಿಕಲ್, ಸಿಲಿಕಾನ್ ಮತ್ತು ಕಾರ್ಬನ್ ಮಿಶ್ರಣ ವಿರುತ್ತದೆ. ಸರಿಯಾದ ರೀತಿಯಲ್ಲಿ ಒಂದು ವೇಳೆ ಪಾತ್ರೆಯನ್ನು ತಯಾರು ಮಾಡದಿದ್ದರೆ, ನೀವು ಅಡುಗೆ ಮಾಡಿದ ನಂತರದಲ್ಲಿ ಇದು ನಿಮ್ಮ ದೇಹದ ಮೇಲೆ ಪ್ರಭಾವ ಬೀರುವ ಸಾಧ್ಯತೆ ಇರುತ್ತದೆ.
ಹಾಗಾಗಿ ಒಂದು ವೇಳೆ ನೀವು ಸ್ಟೇನ್ಲೆಸ್ ಸ್ಟೀಲ್ ಪಾತ್ರೆಯಲ್ಲಿ ಅಡುಗೆ ಮಾಡಿ ತಿನ್ನಬೇಕು ಎಂದು ಕೊಂಡರೆ ಸಾಧ್ಯವಾದಷ್ಟು ಹೆಚ್ಚಿನ ಗುಣಮಟ್ಟದ ಮತ್ತು ಬಾಳಿಕೆ ಬರುವ ಪಾತ್ರೆಯನ್ನು ಖರೀದಿಸಿ.
ಕಲಾಯಿ ಮಾಡಿಸದ ತಾಮ್ರದ ಪಾತ್ರೆಗಳು:—-ತಾಮ್ರದ ಚೊಂಬಿನಲ್ಲಿ ಬೆಳಗ್ಗೆ ಎದ್ದು ನೀರು ಕುಡಿಯಬೇಕು ಎಂದು ಹೇಳುತ್ತಾರೆ. ಏಕೆಂದರೆ ಇದು ಆರೋಗ್ಯದ ಮೇಲೆ ಸಾಕಷ್ಟು ಒಳ್ಳೆಯ ಪರಿಣಾಮ ಬೀರುತ್ತದೆ ಎನ್ನುವ ಕಾರಣಕ್ಕೆ. ಆದರೆ ಬಳಸುವ ತಾಮ್ರದ ಪಾತ್ರೆ ಹೇಗಿದೆ ಎಂಬುದನ್ನು ಮೊದಲು ತಿಳಿದುಕೊಳ್ಳಬೇಕು.ಕಲಾಯಿ ಮಾಡಿಸಿದ ತಾಮ್ರದ ಪಾತ್ರೆಗಳಲ್ಲಿ ಬೇಯಿಸಿ ತಿನ್ನುವುದು ಒಳ್ಳೆಯದು. ಆದರೆ ಕಲಾಯಿ ಮಾಡಿಸದ ತಾಮ್ರದ ಪಾತ್ರೆಗಳಲ್ಲಿ ಅಡುಗೆ ಮಾಡುವಾಗ ಹೆಚ್ಚಿನ ಪ್ರಮಾಣದಲ್ಲಿ ತಾಮ್ರದ ಅಂಶಗಳು ಆಹಾರ ಪದಾರ್ಥ ಗಳ ಜೊತೆಗೆ ಮಿಕ್ಸ್ ಆಗುತ್ತದೆ.ನಿರಂತರವಾಗಿ ದೀರ್ಘಕಾಲದವರೆಗೆ ಇದೇ ರೀತಿ ಹೆಚ್ಚಿನ ಪ್ರಮಾಣದ ತಾಮ್ರದ ಅಂಶ ನಮ್ಮ ದೇಹ ಸೇರುತ್ತಿದ್ದರೆ, ಅದರಿಂದ ಲಿವರ್ ಮತ್ತು ಕಿಡ್ನಿ ಹಾಳಾಗಬಹುದು.
ಅಲ್ಯೂಮಿನಿಯಂ ಪಾತ್ರೆಗಳು:–ಸಾಕಷ್ಟು ಮನೆಗಳಲ್ಲಿ ಅಡುಗೆ ಮಾಡಲು ಅಲ್ಯೂಮಿ ನಿಯಂ ಪಾತ್ರೆಗಳು ಬಳಕೆಯಾಗುತ್ತಿವೆ. ಇವುಗಳಲ್ಲಿ ಬಿಸಿ ಚೆನ್ನಾಗಿ ತಗಲುತ್ತದೆ ಎನ್ನುವ ಕಾರಣಕ್ಕೆ ಜನರು ಈ ಪಾತ್ರೆಗಳನ್ನು ಬಳಕೆ ಮಾಡುತ್ತಾರೆ.ಆದರೆ ಎಲ್ಲಾ ಬಗೆಯ ಅಡುಗೆಗಳನ್ನು ಮಾಡಲು ಈ ಪಾತ್ರೆಗಳು ಸೂಕ್ತ ಎಂದು ಹೇಳಲು ಆಗುವುದಿಲ್ಲ.ಆಮ್ಲೀಯ ಅಂಶ ಹೊಂದಿರುವ ಟೊಮೆಟೊ ಹಣ್ಣು, ವಿನೆಗರ್ ಮತ್ತು ಸಿಟ್ರಸ್ ಅಂಶ ಹೊಂದಿರುವ ಆಹಾರಗಳು ಈ ಪಾತ್ರೆಯನ್ನು ಹಾಳು ಮಾಡುತ್ತವೆ.ಹೀಗಾಗಿ ಇಂತಹ ಆಹಾರ ಪದಾರ್ಥಗಳನ್ನು ಸಾಧ್ಯವಾದಷ್ಟು ಅಲ್ಯುಮಿನಿಯಂ ಪಾತ್ರೆಗಳಿಂದ ಹೊರತಾಗಿ ಬೇಯಿಸಿ.
ಹಿತ್ತಾಳೆ ಪಾತ್ರೆಗಳು
ಹಿತ್ತಾಳೆ ಪಾತ್ರೆಗಳಲ್ಲಿ ಬೇಯಿಸಿ ತಿನ್ನುವುದು ಆರೋಗ್ಯಕ್ಕೆ ಅಂತಹದ್ದೇನೂ ಕೆಟ್ಟದ್ದಲ್ಲ. ಆದರೂ ಕೂಡ ಇವುಗಳಲ್ಲಿ ಅಡುಗೆ ಮಾಡುವುದು ಅಷ್ಟು ಒಳ್ಳೆಯದೂ ಅಲ್ಲ.ಬಸಿ ಮಾಡಿದಾಗ ಹಿತ್ತಾಳೆ ಪಾತ್ರೆಗಳು ಉಪ್ಪು ಮತ್ತು ಆಮ್ಲಿಯ ಆಹಾರಗಳ ಜೊತೆಗೆ ರಿಯಾಕ್ಷನ್ ಆಗುತ್ತದೆ. ಇಂತಹ ಆಹಾರ ಗಳನ್ನು ತಿನ್ನುವುದರಿಂದ ಆರೋಗ್ಯದ ಮೇಲೂ ಕೆಟ್ಟ ಪರಿಣಾಮ ಬೀರುತ್ತದೆ. ಹಾಗಾಗಿ ಎಚ್ಚರದಿಂದಿರಿ.
ಹಾಗಾದರೆ ಯಾವ ಪಾತ್ರೆಗಳು ಅಡುಗೆಗೆ ಬೆಸ್ಟ್?
1) ಜೇಡಿ ಮಣ್ಣಿನ ಮಡಿಕೆಗಳು ಅಂದಿಗೂ, ಇಂದಿಗೂ ಮತ್ತು ಎಂದೆಂದಿಗೂ ಉತ್ತಮ. ಏಕೆಂದರೆ ಇವುಗಳಲ್ಲಿ ತೇವಾಂಶ ಮತ್ತು ತಾಪಮಾನ ಎರಡು ಸಹ ಅಡುಗೆಗಳಲ್ಲಿ ಇರುವ ಪೌಷ್ಟಿಕಾಂಶಗಳನ್ನು ಹಾಗೆ ಉಳಿಸುತ್ತವೆ.
2) ಕಬ್ಬಿಣದ ಪಾತ್ರೆಗಳು ಸಹ ಆರೋಗ್ಯಕರವಾದ ಅಡುಗೆಗೆ ಸೂಕ್ತ ಎಂದು ಹೇಳಲಾಗುತ್ತದೆ. ಏಕೆಂದರೆ ಅಡುಗೆ ಮಾಡುವಾಗ ಕಬ್ಬಿಣದ ಅಂಶ ಆಹಾರದಲ್ಲಿ ಸೇರ್ಪಡೆಯಾಗುತ್ತದೆ. ಇದು ನಮ್ಮ ದೇಹಕ್ಕೆ ಅವಶ್ಯಕ ಕೂಡ.
3) ಕಂಚಿನ ಪಾತ್ರೆಗಳು ಕೂಡ ತಯಾರಾದ ಅಡುಗೆಯಲ್ಲಿ ಶೇಕಡ 97% ಪೌಷ್ಟಿಕಾಂಶಗಳನ್ನು ಹಾಗೆ ಉಳಿಸುತ್ತವೆ ಎಂದು ಹೇಳಲಾಗುತ್ತದೆ. ಆದರೆ ಈ ತರಹದ ಪಾತ್ರೆಗಳಲ್ಲಿ ನಿಕಲ್ ಮತ್ತು ಟಿನ್ ಪ್ರಮಾಣ ಹೆಚ್ಚಾಗಿರಬಾರದು ಅಷ್ಟೇ!
