ರಾತ್ರಿ ಮಲಗುವ ಮುನ್ನ ಪಾದಗಳಿಗೆ ಎಣ್ಣೆ ಹಚ್ಚಿ ಒಂದೆರಡು ನಿಮಿಷ ಮಸಾಜ್‌ ಮಾಡುವುದರಿಂದ ಆರೋಗ್ಯಕ್ಕೆ ಸಾಕಷ್ಟು ಲಾಭಗಳನ್ನು ಪಡೆಯಬಹುದು ಎನ್ನುತ್ತದೆ ಆಯುರ್ವೇದ ಪದ್ಧತಿ.
ಪಾದಗಳು ನಮ್ಮ ದೇಹದ ಪ್ರಮುಖ ಅಂಗಗಳಲ್ಲೊಂದು. ಇಡೀ ದಿನ ನಡೆಯುತ್ತೇವೆ, ಬಿಗಿಯಾದ, ಚಪ್ಪಲಿ, ಶೂಗಳನ್ನು ಧರಿಸುತ್ತೇವೆ. ಇದರಿಂದಾಗಿ ಕೆಲವೊಮ್ಮೆ ರಕ್ತ ಸಂಚಾರಕ್ಕೆ ಅಡ್ಡಿಯಾಗಿ ಪಾದ ಊದಿಕೊಳ್ಳುತ್ತದೆ.
ಅದೂ ಅಲ್ಲದೆ ದೇಹದ ತೂಕ ಅತಿಯಾಗಿದ್ದರೆ, ಗರ್ಭಾವಸ್ಥೆಯ ಸಮಯದಲ್ಲಿ ಪಾದಗಳ ಮೇಲೆ ಭಾರ ಬೀಳುವ ಕಾರಣ ನೋವಿನಿಂದ ಕೂಡಿರುವಂತೆ ಮಾಡುತ್ತದೆ. ಆದ್ದರಿಂದ ಪ್ರತಿದಿನ ರಾತ್ರಿ ಮಲಗುವ ಮುನ್ನ ಪಾದಗಳಿಗೆ ಎಣ್ಣೆ ಹಚ್ಚಿ ಒಂದೆರಡು ನಿಮಿಷ ಮಸಾಜ್‌ ಮಾಡುವುದು ಬಹಳ ಒಳ್ಳೆಯದು. ಇದರಿಂದ ಆರೋಗ್ಯಕ್ಕೂ ಸಾಕಷ್ಟು ಲಾಭಗಳನ್ನು ಪಡೆಯಬಹುದು. ಈ ಬಗ್ಗೆ ಆಯುರ್ವೇದ ವೈದ್ಯೆ ನಿತಿಕಾ ಕೊಹ್ಲಿ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ ನೋಡೋಣ ಬನ್ನಿ,
ಪಾದಗಳಿಗೆ ಎಣ್ಣೆಯ ಮಸಾಜ್‌
ಪ್ರತಿದಿನ ರಾತ್ರಿ ಮಲಗುವ ಮುನ್ನ ಪಾದಗಳನ್ನು ಚೆನ್ನಾಗಿ ತೊಳೆದ ನಂತರ ಎಣ್ಣೆಯನ್ನು ಹಚ್ಚಿ ಮಸಾಜ್‌ ಮಾಡಬೇಕು. ಎಳ್ಳೆಣ್ಣೆ ಅಥವಾ ಕೊಬ್ಬರಿ ಎಣ್ಣೆ ಯಾವುದಾದರೂ ತೊಂದರೆ ಇಲ್ಲ. ಇದನ್ನು ತುಸು ಬಿಸಿ ಮಾಡಿ ಹಚ್ಚಿದರೆ ಇನ್ನೂ ಒಳ್ಳೆಯದು.ಇದರಿಂದ ಹಿಮ್ಮಡಿಯ ಬಿರುಕಿದ್ದರೆ ಅಥವಾ ಧೂಳು, ನಿರ್ಜಲೀಕರಣದಿಂದ ಒಣಗಿದ ಚರ್ಮವಿದ್ದರೆ ಸರಿಯಾಗಿ ಮೃದು ಚರ್ಮ ನಿಮ್ಮದಾಗುತ್ತದೆ.
ನರಗಳಿಗೆ ಹಿತ
ಇಡೀ ದಿನ ಪಾದಗಳ ಮೇಲೆ ಒತ್ತಡ ಬೀಳು ಕಾರಣ ಅಥವಾ ಬಿಗಿಯಾದ ಚಪ್ಪಲಿಗಳನ್ನು ಧರಿಸಿ ನರಗಳಿಗೆ ಸರಿಯಾಗಿ ರಕ್ತಸಂಚಾರವಾಗುವುದಿಲ್ಲ. ಅಲ್ಲದೆ ಕೆಲವೊಮ್ಮೆ ನರಗಳು ಹಿಡಿದಂತಾಗಿರುತ್ತದೆ.ಎಣ್ಣೆ ಹಚ್ಚಿ ಮಸಾಜ್‌ ಮಾಡಿದಾಗ ಬಿಗಿಯಾದ ನರಗಳು ಸಡಿಲವಾಗುತ್ತವೆ. ಇದರಿಂದ ರಕ್ತ ಸಂಚಾರ ಸುಲಭವಾಗುತ್ತದೆ. ಅಲ್ಲದೆ ಪಾದಗಳಲ್ಲಿ ನೋವಿದ್ದರೂ ಕೂಡ ನಿವಾರಣೆಯಾಗುತ್ತದೆ.
ಪಾದಗಳಿಗೆ ಎಣ್ಣೆಯ ಮಸಾಜ್‌
ಆರಾಮದಾಯಕ ಅನುಭವ-ಪಾದಗಳಿಗೆ ಎಣ್ಣೆ ಹಚ್ಚಿಕೊಳ್ಳುವುದರಿಂದ ಇಡೀ ದೇಹಕ್ಕೆ ಆರಾಮದ ಅನುಭವಾಗುತ್ತದೆ. ಒತ್ತಡ, ದಣಿವು ಮಾಯವಾಗಿ ರಿಲಾಕ್ಸ್‌ ಆದ ಭಾವನೆ ಮೂಡುತ್ತದೆ.ಇದರಿಂದ ಪಾದದ ನರಗಳಲ್ಲಿ ರಕ್ತಹೆಪ್ಪುಗಟ್ಟುವ ಸಮಸ್ಯೆ ಇದ್ದರೆ ನಿವಾರಣೆಯಾಗಿ ಕಾಲು ನೋವು ಕೂಡ ಶಮನವಾಗುತ್ತದೆ.
ಆಕ್ಯುಪಂಕ್ಚರ್‌ ಪಾಯಿಂಟ್‌ಗಳಿಗೆ ಒಳ್ಳೆಯದು
ಪಾದಗಳಿಗೆ ಎಣ್ಣೆಯ ಮಸಾಜ್‌ ಮಾಡಿದರೆ ಕಾಲು ಮತ್ತು ಕಾಲಿನ ಸ್ನಾಯುಗಳನ್ನು ವಿಶ್ರಾಂತಿ ಮಾಡಲು ಮತ್ತು ಪ್ಲ್ಯಾಂಟರ್ ಫ್ಯಾಸಿಟಿಸ್ ನೋವನ್ನು ಕಡಿಮೆ ಮಾಡಲು ಪ್ರಚೋದಕ ಬಿಂದುಗಳನ್ನು ಬಿಡುಗಡೆ ಮಾಡಲು ಸಹಾಯ ಮಾಡುತ್ತದೆ.ಇದರಿಂದಾಗಿ ರಕ್ತಪರಿಚಲನೆ ಉತ್ತಮವಾಗಿ, ಸ್ನಾಯುವಿನ ಬಿಗಿತವನ್ನು ನಿವಾರಿಸುತ್ತದೆ ಮತ್ತು ಚಲನೆಯ ವ್ಯಾಪ್ತಿಯನ್ನು ಸುಧಾರಿಸುತ್ತದೆ.
ಚೆನ್ನಾಗಿ ನಿದ್ದೆ ಬರಲು
ಕೆಲವರಿಗೆ ರಾತ್ರಿ 9 ಗಂಟೆ ನಿದ್ದೆ ಮಾಡಿದರೂ ಬೆಳಗ್ಗೆ ಎದ್ದಾಗ ನಿದ್ದೆ ಅಪೂರ್ಣ ಎನಿಸುತ್ತದೆ. ಇದಕ್ಕೆ ದೇಹ ಅತಿಯಾಗಿ ಸುಸ್ತಾಗಿರುವುದು ಕಾರಣವಾಗಿರುತ್ತದೆ. ಪಾದಗಳಿಗೆ ಎಣ್ಣೆ ಹಚ್ಚಿ ಮಸಾಜ್‌ ಮಾಡುವುದರಿಂದ ರಕ್ತ ಪರಿಚಲನೆ ಉತ್ತಮವಾಗಿ ನಿದ್ದೆ ಚೆನ್ನಾಗಿ ಬರುತ್ತದೆ.ಅಲ್ಲದೆ ಬೆಳಗ್ಗೆ ಏಳುವಷ್ಟರಲ್ಲಿ ಫ್ರೆಶ್‌ ಫೀಲ್‌ ಸಿಗುತ್ತದೆ. ಹೀಗಾಗಿ ಪ್ರತಿನಿತ್ಯ ರಾತ್ರಿ ಮಲಗುವಾಗ ಪಾದಕ್ಕೆ ಎಣ್ಣೆ ಹಚ್ಚಿ ಮಸಾಜ್‌ ಮಾಡಿ ಮಲಗಿ.
