ನವ ದುರ್ಗೆಯರಿಗೆ ಪ್ರಿಯವಾದ ಬಣ್ಣಗಳು ಯಾವುವು.? ಯಾವ ದಿನ ಯಾವ ಬಣ್ಣದ ಬಟ್ಟೆ ಧರಿಸಿ ಪೂಜೆ ಮಾಡಬೇಕು!

ನವರಾತ್ರಿ ಹಬ್ಬವನ್ನು ವರ್ಷಕ್ಕೆ ಎರಡು ಬಾರಿ ಅಂದರೆ ಒಂದು ಚೈತ್ರ ನವರಾತ್ರಿ ಮತ್ತು ಇನ್ನೊಂದು ಶಾರದೀಯ ನವರಾತ್ರಿ ಎಂದು ಆಚರಿಸಲಾಗುತ್ತದೆ. ನವರಾತ್ರಿ ಎಂಬ ಪದವು ಒಂಭತ್ತು ರಾತ್ರಿಗಳು ಎನ್ನುವ ಸಂಸ್ಕೃತ ಅರ್ಥವನ್ನು ಹೊಂದಿದೆ. ಈ 9 ದಿನಗಳವರೆಗೆ ದುರ್ಗಾ ದೇವಿಯ 9 ರೂಪವನ್ನು ಪೂಜಿಸಲಾಗುತ್ತದೆ. 9 ದಿನವೂ ತನ್ನದೇ ಆದ ಮಹತ್ವವನ್ನು ಪಡೆದುಕೊಂಡಿದೆ. ನವರಾತ್ರಿಯನ್ನು ದೇಶದ ವಿವಿಧ ಭಾಗಗಳಲ್ಲಿ ವಿವಿಧ ರೀತಿಯಲ್ಲಿ ಆಚರಿಸಲಾಗುತ್ತದೆ. 2023 ರಲ್ಲಿ ನೀವು ನವರಾತ್ರಿಯ 9 ದಿನವೂ ಯಾವ ಬಣ್ಣವನ್ನು ಧರಿಸಬೇಕು ಗೊತ್ತಾ..? 9 ದಿನವೂ ಆಯಾ ದಿನದ ದೇವಿಗೆ ಪ್ರಿಯವಾದ ಬಣ್ಣವನ್ನು ಧರಿಸುವುದರಿಂದ ದೇವಿಯು ನಿಮ್ಮ ಮೇಲೆ ಸಂತುಷ್ಟಳಾಗುತ್ತಾಳೆ ಎನ್ನುವ ನಂಬಿಕೆಯಿದೆ. ನವರಾತ್ರಿ 2023 ರ 9 ದಿನವೂ ಯಾವ ಬಣ್ಣವನ್ನು ಧರಿಸಬೇಕು ಎಂಬುದನ್ನು ಈ ಲೇಖನದಿಂದ ತಿಳಿದುಕೊಳ್ಳಿ.

​ದಿನ 1 – ಬಿಳಿ

ನವರಾತ್ರಿ ಹಬ್ಬದ ಮೊದಲ ಬಣ್ಣ ಬಿಳಿ. ಈ ಪ್ರಶಾಂತ ಮತ್ತು ಶಾಂತ ಬಣ್ಣವನ್ನು ಯಾರು ಇಷ್ಟಪಡುವುದಿಲ್ಲ ಹೇಳಿ..? ಮೊದಲನೇ ದಿನ ಶೈಲಪುತ್ರಿ ದೇವಿಯನ್ನು ಪೂಜಿಸಲಾಗುತ್ತದೆ. ಆಕೆಯು ಶಾಂತ ಸ್ವಭಾವದವಳಾಗಿದ್ದಾಳೆ. ಈ ದಿನ ನಿಮ್ಮ ಮನೆಯನ್ನು ಅಲಂಕರಿಸಲು ನೀವು ಮಲ್ಲಿಗೆ ಅಥವಾ ಬಿಳಿ ಕಮಲದಂತಹ ಹೂವುಗಳನ್ನು ಬಳಸಬಹುದು. ಬಿಳಿ ಬಟ್ಟೆಗಳನ್ನು ಧರಿಸಬಹುದು.

​ದಿನ 2 – ಕೆಂಪು

ನವರಾತ್ರಿಯ 9 ಬಣ್ಣಗಳಲ್ಲಿ ಕೆಂಪು ಬಣ್ಣವು ಅತ್ಯಂತ ಶಕ್ತಿಶಾಲಿಯಾಗಿದೆ. ಕೆಂಪು ಕಾಳಿ ದೇವಿಯ ಬಣ್ಣ. ಇದು ಶಕ್ತಿ ಮತ್ತು ಉಗ್ರತೆಯನ್ನು ಸೂಚಿಸುತ್ತದೆ. ಈ ದಿನದಂದು ಬ್ರಹ್ಮಚಾರಿಣಿ ದೇವಿಯನ್ನು ಪೂಜಿಸಲಾಗುತ್ತದೆ. ಪ್ರಕಾಶಮಾನವಾದ ಕೆಂಪು ಹೂವುಗಳಿಂದ ಮನೆಯನ್ನು ಅಲಂಕರಿಸಬೇಕು ಮತ್ತು ಕೆಂಪು ಬಣ್ಣದ ಹಣ್ಣುಗಳನ್ನು ಪ್ರಸಾದವಾಗಿ ಅರ್ಪಿಸಬೇಕು.

​ದಿನ 3 – ಕಡು ನೀಲಿ

ನವರಾತ್ರಿ 2023 ರಲ್ಲಿ ನೀವು ಮೂರನೇ ದಿನದಂದು ಕಡು ನೀಲಿ ಬಣ್ಣವನ್ನು ಧರಿಸಬೇಕು. ಈ ಬಣ್ಣವನ್ನು ದುರ್ಗಾ ದೇವತೆಯನ್ನು ಮೆಚ್ಚಿಸಲು ಬಳಸಲಾಗುತ್ತದೆ. ನವರಾತ್ರಿಯಲ್ಲಿ ನೀಲಿ ಬಣ್ಣದ ಬಟ್ಟೆಗಳನ್ನು ಧರಿಸಿ ಮತ್ತು ಈ ದೇವಿಯನ್ನು ಪೂಜಿಸುವುದು ಆರೋಗ್ಯ, ಸಂಪತ್ತು ಮತ್ತು ಶಕ್ತಿಯನ್ನು ಸುಧಾರಿಸುತ್ತದೆ ಎಂದು ನಂಬಲಾಗಿದೆ.

​ದಿನ 4 – ಹಳದಿ

ನವರಾತ್ರಿ 2023 ರಲ್ಲಿ ನೀವು ನಾಲ್ಕನೇ ದಿನದಂದು ಹಳದಿ ಬಣ್ಣವನ್ನು ಧರಿಸಬೇಕು. ಹಿಂದೂ ಧರ್ಮದಲ್ಲಿ, ಹಳದಿ ಬಣ್ಣವನ್ನು ಕಲಿಕೆ ಮತ್ತು ಜ್ಞಾನದ ಬಣ್ಣವೆಂದು ಚಿತ್ರಿಸಲಾಗಿದೆ. ಈ ದಿನ ಅರಿಶಿನವನ್ನು ಉದಾರವಾಗಿ ಬಳಸಿ. ಅಡುಗೆಗಾಗಿ ಅರಿಶಿನವನ್ನು ಬಳಸಿ, ದೇವಿಯನ್ನು ಪ್ರಾರ್ಥಿಸುವಾಗಲೂ ಈ ಬಣ್ಣವನ್ನು ಬಳಸಿ ಮತ್ತು ಅರಿಶಿನದ ನೀರಿನಿಂದ ಸ್ನಾನವನ್ನು ಮಾಡಿ ದೇವಿಯನ್ನು ಪೂಜಿಸಬಹುದು.

​ದಿನ 5 – ಹಸಿರು

2023 ರ ನವರಾತ್ರಿಯ ಐದನೇ ದಿನದಂದು ಹಸಿರು ಬಣ್ಣವನ್ನು ಧರಿಸಿ. ಈ ಬಣ್ಣವು ಹೊಸ ಆರಂಭ, ಬೆಳವಣಿಗೆ ಮತ್ತು ಅಭಿವೃದ್ಧಿಯನ್ನು ಸೂಚಿಸುತ್ತದೆ. ಹಸಿರು ಬಣ್ಣವು ತಾಯಿಯ ಪ್ರಕೃತಿಯ ಬಣ್ಣವಾಗಿದೆ ಮತ್ತು ಸ್ಕಂದಮಾತಾ ದೇವಿಯನ್ನು ಈ ಬಣ್ಣದೊಂದಿಗೆ ಪೂಜಿಸಲಾಗುತ್ತದೆ. ನವರಾತ್ರಿಯ ಐದನೇ ದಿನದಂದು ದೇವಿಯ ಆಶೀರ್ವಾದ ಪಡೆಯಲು ಎಲ್ಲರೂ ಹಸಿರು ಬಣ್ಣದ ಬಟ್ಟೆಗಳನ್ನು ಧರಿಸಿ.

​ದಿನ 6 – ಬೂದು ಬಣ್ಣ

2023 ರ ನವರಾತ್ರಿ ಹಬ್ಬದ 6 ನೇ ದಿನದಂದು ಬೂದು ಬಣ್ಣದ ಬಟ್ಟೆಯನ್ನು ಧರಿಸಬೇಕು. ಬೂದು ಬಣ್ಣ ಕೂಡ ಬಿಳಿ ಬಣ್ಣದಂತೆ ಶಾಂತ ಮತ್ತು ಸೊಗಸಾದ ವರ್ಣವಾಗಿದೆ. ಅಲ್ಲದೆ, ಕಾತ್ಯಾಯಿನಿ ದೇವತೆಯ ಆಶೀರ್ವಾದವನ್ನು ಪಡೆದುಕೊಳ್ಳಲು ಬೂದು ಬಣ್ಣವನ್ನು ಬಳಸಲಾಗುತ್ತದೆ.

​ದಿನ 7 – ಕಿತ್ತಳೆ

ನವರಾತ್ರಿ ಹಬ್ಬದ 7ನೇ ದಿನದಂದು ನೀವು ಕಿತ್ತಳೆ ಬಣ್ಣವನ್ನು ಧರಿಸಬಹುದು. ಕಿತ್ತಳೆ ಬಣ್ಣವು ನೋಡುಗರ ಕಣ್ಸೆಳೆಯುವ ಮತ್ತು ಆಕರ್ಷಕವಾದ ಬಣ್ಣಗಳಲ್ಲಿ ಒಂದಾಗಿದೆ. ಕಿತ್ತಳೆ ಬಣ್ಣವು ಸಾಮಾನ್ಯವಾಗಿ ಉಷ್ಣತೆ, ಬೆಂಕಿ ಮತ್ತು ಶಕ್ತಿಯನ್ನು ಸೂಚಿಸುತ್ತದೆ. ಕಾಳರಾತ್ರಿ ದೇವಿಯನ್ನು ಕಿತ್ತಳೆ ಬಣ್ಣದಿಂದ ಪೂಜಿಸಲಾಗುತ್ತದೆ ಮತ್ತು ನಿಮ್ಮ ಮನೆ ಮತ್ತು ಪೂಜಾ ಕೋಣೆಯನ್ನು ಕಿತ್ತಳೆ ಬಣ್ಣದ ಹೂವುಗಳಿಂದ ಅಲಂಕರಿಸಿ.

​ದಿನ 8 – ಪಿಕಾಕ್‌ ಗ್ರೀನ್‌

ನವರಾತ್ರಿ ಹಬ್ಬದ 8 ನೇ ದಿನದಂದು ಪಿಕಾಕ್‌ ಗ್ರೀನ್‌ ಬಣ್ಣವನ್ನು ಧರಿಸಬೇಕು. ಈ ದಿನ ಮಹಾಗೌರಿ ದೇವಿಯನ್ನು ಪೂಜಿಸಲಾಗುತ್ತದೆ. ಮಹಾಗೌರಿಯೆಂದರೆ ಅವಳು ಆಧ್ಯಾತ್ಮಿಕ ಶಕ್ತಿಯೊಂದಿಗೆ ಜನರನ್ನು ಆಶೀರ್ವದಿಸುತ್ತಾಳೆ.

​ದಿನ 9 – ಗುಲಾಬಿ

2023 ರ ನವರಾತ್ರಿ ಹಬ್ಬದ 9 ನೇ ದಿನದಂದು ಅಂದರೆ ನವರಾತ್ರಿ ಹಬ್ಬದ ಕೊನೆಯ ದಿನದಂದು ಸಿದ್ಧಿದಾತ್ರಿ ದೇವಿಗೆ ಪ್ರಿಯವಾದ ಗುಲಾಬಿ ಬಣ್ಣವನ್ನು ಧರಿಸಬೇಕು. ಸಿದ್ಧಿದಾತ್ರಿ ದೇವಿಯು ದುರ್ಗೆಯ ಅವತಾರವಾಗಿದ್ದು, ಜೀವನದಲ್ಲಿ ಎಲ್ಲಾ ದುಃಖಗಳನ್ನು ತೊಡೆದುಹಾಕಲು ಜನರು ಅವಳನ್ನು ಪೂಜಿಸುತ್ತಾರೆ. ಸಾಮಾನ್ಯವಾಗಿ ಗುಲಾಬಿ ಬಣ್ಣವು ಶಾಂತಿ ಮತ್ತು ಬುದ್ಧಿವಂತಿಕೆಯ ಬಣ್ಣವಾಗಿದೆ.