ಹೊಟ್ಟೆ ತುಂಬುವ ರೀತಿ ಆಹಾರ ತಿನ್ನುವ ಬದಲು ಅರ್ಧ ಹೊಟ್ಟೆಯ ಆಹಾರ ಸೇವಿಸಿ, ಅಗತ್ಯವಿದ್ದಾಗ ನಿತ್ಯ ಎರಡ್ಮೂರು ಬಗೆಯ ಹಣ್ಣುಗಳನ್ನು ಸೇವಿಸಿದರೆ ದೇಹ ಆರೋಗ್ಯವಾಗಿರುತ್ತದೆ ಎಂದು ವೈದ್ಯರು ಸಲಹೆ ನೀಡುತ್ತಾರೆ. ಆದರೆ, ನಾವು ಅತಿಯಾಗಿ ಕೆಲ ಹಣ್ಣುಗಳನ್ನು ಸೇವಿಸಿದ್ರೆ ಅಪಾಯ ಸಹ ಇದೆ ಅಂತಾರೆ. ಅದರಲ್ಲಿ ಪೇರಳೆ ಹಣ್ಣು ಮೊದಲನೆಯದು.
ಮಾರುಕಟ್ಟೆಯಲ್ಲಿ ಸಿಗುವ ದುಬಾರಿ ಹಣ್ಣುಗಳನ್ನು ಎಲ್ಲರೂ ಖರೀದಿಸಿ ತಿನ್ನಲು ಸಾಧ್ಯವಿಲ್ಲ. ಆದರೆ ಅಗ್ಗದ, ರುಚಿಕರವಾದ ಮತ್ತು ಉತ್ತಮ ವಾಸನೆಯನ್ನು ಹೊಂದಿರುವ ಹಣ್ಣುಗಳಲ್ಲಿ ಒಂದಾದ ಪೇರಳೆಹಣ್ಣನ್ನು ನಾವು ಸುಲಭವಾಗಿ ಖರೀದಿಸಬಹುದು.
ಪೇರಳೆಯಲ್ಲಿ ಹಲವಾರು ಔಷಧೀಯ ಗುಣಗಳಿವೆ. ಇದು ಅಗ್ಗದ ಮತ್ತು ಸುಲಭವಾಗಿ ಲಭ್ಯವಿರುವ ಉತ್ಪನ್ನವಾಗಿರುವುದರಿಂದ, ಅನೇಕ ಜನರಿಗೆ ಇದರ ಪ್ರಯೋಜನಗಳ ಬಗ್ಗೆ ತಿಳಿದಿಲ್ಲ. ದೇಹದಲ್ಲಿನ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಮತ್ತು ನಮ್ಮ ದೇಹದ ತೂಕವನ್ನು ಸ್ಥಿರವಾಗಿಡಲು ಪೇರಳೆ ಹಣ್ಣು ತುಂಬಾ ಸಹಕಾರಿಯಾಗಿದೆ.ಹಾಗಾಗಿ ಪೇರಳೆ ಹಣ್ಣನ್ನು ನಿಯಮಿತವಾಗಿ ತಿನ್ನುವುದರಿಂದ ಹಲವಾರು ಪ್ರಯೋಜನಗಳನ್ನು ಪಡೆಯಬಹುದು.
ವಿಟಮಿನ್ ‘ಸಿ’ ಸಮೃದ್ಧವಾಗಿರುವ ಇದು ನಮಗೆ ರೋಗವನ್ನು ಉಂಟುಮಾಡುವ ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳನ್ನು ನಾಶಮಾಡಲು ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸುತ್ತದೆ. ಈ ಹಣ್ಣಿನಲ್ಲಿರುವ ಲೈಕೋಪೀನ್, ಕ್ವೆರ್ಸೆಟಿನ್, ವಿಟಮಿನ್ ‘ಸಿ’ ಮತ್ತು ಇತರ ಪಾಲಿಫಿನಾಲ್‌ಗಳು ಅತ್ಯುತ್ತಮ ಉತ್ಕರ್ಷಣ ನಿರೋಧಕಗಳಾಗಿ ಕಾರ್ಯನಿರ್ವಹಿಸುತ್ತವೆ ಮತ್ತು ಕ್ಯಾನ್ಸರ್ ಕೋಶಗಳ ರಚನೆಯನ್ನು ತಡೆಯುತ್ತವೆ. ಮತ್ತು ಸ್ತನ ಕ್ಯಾನ್ಸರ್ ಕೋಶಗಳು ನಾಶವಾಗುತ್ತವೆ.
ಮಧುಮೇಹಿಗಳಿಗೆ ಪೇರಳೆ ಹಣ್ಣು ಅತ್ಯುತ್ತಮ ಆಹಾರ. ಇದು ಸೋಡಿಯಂ ಮತ್ತು ಪೊಟ್ಯಾಸಿಯಮ್ ಮಟ್ಟವನ್ನು ಸುಧಾರಿಸುತ್ತದೆ, ಹೀಗಾಗಿ ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ. ಹೃದ್ರೋಗಕ್ಕೆ ಪ್ರಮುಖ ಅಪಾಯಕಾರಿ ಅಂಶಗಳಾದ ಟ್ರೈಗ್ಲಿಸರೈಡ್‌ಗಳು ಮತ್ತು ಕೆಟ್ಟ ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡಲು ಪೇರಳೆ ಹಣ್ಣನ್ನು ಸಹ ಬಳಸಲಾಗುತ್ತದೆ. ಇದು ಒಳ್ಳೆಯ ಕೊಲೆಸ್ಟ್ರಾಲ್ ಅನ್ನು ಹೆಚ್ಚಿಸುತ್ತದೆ.
ದೇಹಕ್ಕೆ ಇನ್ನೂ ಹಲವು ಪ್ರಯೋಜನಗಳನ್ನು ನೀಡುವ ಪೇರಳೆವನ್ನು ಹೆಚ್ಚು ತಿನ್ನಬೇಡಿ. ಪೇರಳೆಯನ್ನು ಹೆಚ್ಚು ತಿನ್ನುವುದರಿಂದ ಆಗುವ ಅಡ್ಡ ಪರಿಣಾಮಗಳು ಸಹ ಹಲವಾರು. ಹೆಚ್ಚು ಪೇರಳೆವನ್ನು ತಿಂದರೆ ದೇಹದ ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ. ಏಕೆಂದರೆ ಫ್ರಕ್ಟೋಸ್ ಎಂಬ ಸಕ್ಕರೆಯ ಒಂದು ವಿಧವು ನಾವು ಅದನ್ನು ಹೆಚ್ಚು ತಿಂದಾಗ ಸುಲಭವಾಗಿ ಜೀರ್ಣವಾಗುವುದಿಲ್ಲ.
ದೇಹದಲ್ಲಿ ಸ್ಥಿರವಾದ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಕಾಯ್ದುಕೊಳ್ಳುವುದು ಆರೋಗ್ಯಕರ ಜೀವನಕ್ಕೆ ಅತ್ಯಗತ್ಯ. ಆದರೆ ಕೆಲವು ಆರೋಗ್ಯ ಅಧ್ಯಯನಗಳು ಅತಿಯಾಗಿ ಪೇರಳೆಯನ್ನು ತಿನ್ನುವುದರಿಂದ ಅಧಿಕ ರಕ್ತದ ಸಕ್ಕರೆಯ ಮಟ್ಟವನ್ನು ಹೆಚ್ಚಿಸಬಹುದು ಎಂದು ಹೇಳಲಾಗುತ್ತದೆ.
ಕೆಲವರಿಗೆ ಪೇರಳೆಯನ್ನು ತಿಂದಾಗ ಅಥವಾ ಅತಿಯಾಗಿ ತಿಂದಾಗ ಅತಿಸಾರ ಅಥವಾ ಕರುಳಿನ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ. ಇದು ಪೇರಲೆಯಲ್ಲಿರುವ ಬೀಜಗಳಿಂದ ಉಂಟಾಗುತ್ತದೆ. ಹಣ್ಣಿಗೆ ಆ ಬೀಜಗಳಿರುವುದು ಅವಶ್ಯವಿದ್ದರೂ ಅದನ್ನು ಅತಿಯಾಗಿ ತಿಂದಾಗ ಹಲವಾರು ಸಮಸ್ಯೆಗಳು ಉಂಟಾಗುತ್ತದೆ.
ಕಾಡಿನಲ್ಲಿ ನೈಸರ್ಗಿಕವಾಗಿ ಬೆಳೆದ ಹಣ್ಣುಗಳು ಬ್ಯಾಕ್ಟೀರಿಯಾದ ಮಾಲಿನ್ಯಕ್ಕೆ ಒಡ್ಡಿಕೊಂಡಿರುತ್ತದೆ. ಪೇರಳೆ ಇದಕ್ಕೆ ಹೊರತಾಗಿಲ್ಲ. ಕೆಲವು ರೀತಿಯ ಬ್ಯಾಕ್ಟೀರಿಯಾಗಳು ನೀರು ಮತ್ತು ಮಣ್ಣಿನ ಮೂಲಕ ಪೇರಲೆಯಂತಹ ಹಣ್ಣುಗಳಿಗೆ ಅಂಟಿಕೊಳ್ಳಬಹುದು. ಹಣ್ಣಿನ ಹೊರಭಾಗ ಎಷ್ಟೇ ಗಟ್ಟಿಯಾಗಿದ್ದರೂ ಬ್ಯಾಕ್ಟೀರಿಯಾಗಳು ಒಳಗೆ ಬರಬಹುದು. ಆದ್ದರಿಂದ ಪೇರಳೆಯನ್ನು ಸೇವಿಸುವಾಗ ಯಾವಾಗಲೂ ಜಾಗರೂಕರಾಗಿರಿ. ಮಿತವಾಗಿ ತಿನ್ನಿ ಮತ್ತು ಆರೋಗ್ಯವಾಗಿರಿ.
